Mäi Blog

Wei ech mat dësem Blog ugefaang hunn, hunn ech gemengt ech géing en op däitsch schreiwen. Zu deem Zäitpunkt hat ech just meng zwee éischt Bicher bei Amazon eropgelueden an hu geduecht den däitsche Marché am Stuerm ze eroberen. A wa meng dausende Lieser da géingen op mäi Blog kucke kommen, misst e jo bal op däitsch sinn.
Ma Quetschen och!
Et waren tatsächlech dausenden Downloads op Amazon do. Sollt ee vun deenen Hären oder Dammen vum Steieramt hei mattliesen muss ech iech enttäuschen. Di dausenden Downloads waren all am Kader vu gratis Aktiounen. Dat eenzegt wat déi Downloads mir bruecht hunn, si Rezensiounen. An zwar negativer. Ech hu mech e bëssi informéiert a Foren an och soss um Internet. Et gëtt tatsächlech Leit déi sech ee Buch gratis eroflueden just mam Ziel et negativ ze rezenséieren. Sënn an Zweck ass et verschidden aner Auteuren oder esou guer sech selwer ze pushen. Traureg esou eppes.
Dowéinst hunn ech mech elo dozou entscheed just nach lëtzebuergesch Bicher ze schreiwen an och mäi Blog op lëtzebuergesch ze schreiwen. Als klénge Merci u meng Lieser déi ech jo zu Lëtzebuerg tatsächlech hunn.
An dann hei nach eng Neiegkeet. Och meng léif Protagonistin Maria Ferreira wäert ënner der Entscheedung keng Krimien méi fir den däitsche Maart ze schreiwen leiden. Et wäert, bis op weideres, kee “Maria Ferreiras dritter Fall” ginn. Dofir hunn ech awer eng ganz nei Geschicht op lëtzebuergesch geschriwwen. Et geet erëm em ee Mord. An zwar am Uelzechtdall. “De Kommissär Jacques Majerus ermëttelt”
Lo muss ech, ier ech iwwer de Jacques Majerus weider schreiwen awer eng kléng Klammer opmaan: Ech sinn esou enttäuscht dass een als sougenannten “Indie-Auteur” nimools d’Chance huet an d’Bestsellerlëschten ze kommen. Well fir dohin ze kommen brauch een ee Verlag. Déi Leit wou dee “Concours” organiséieren soen zwar dat wär net wouer, well wann een an enger Librairie géing genuch verkafen wär et awer méiglech matzemaachen, mee et verkeeft een net genuch an enger Librairie. Et kritt een ni d’Chance dozou. Dowéinst hunn ech da lo probéiert de Jacques Majerus iwwer ee Verlag erauszebréngen. Bis ech do eng Äntwert kréien wäert nach e bëssi Zäit vergoen. Also Gedold!
Egal wei wäert de Jacques awer nächst Joer op de Marché kommen.
De Moment schaffen ech ganz intensiv un engem anere Projet. Well deen awer nach an de Kannerschong stécht wäert ech mech schwéier hidden hei ewell eppes do driwwer ze soen. Just esou vill: Et ass keng erfonnte Geschicht awer et geet em ee ganz eescht Thema wat eis all eppes ugeet. No an no wäert ech iech hei op d’Spuer bréngen. Bis dohin: Gedold, Gedold! Well matt Gedold gëtt aus Gras Mëllech!

This entry was posted in Uncategorized. Bookmark the permalink.

Leave a Reply