De Copyright

Ech hat mech mol virun enger Zäitchen matt enger Responsabel vun enger Maison Relais an den Hoer. Si huet mir dach tatsächlech riicht an d’Gesiicht gesot dass si géing eent vu mengen Éischt Hëllef Bicher kafen an dann de Kanner Kopien maachen. Ech hunn hier erkläert dass et verbuede wär fir einfach esou Kopien aus engem Buch ze maachen. Du sot si: “Dann huelen ech ebe keent!” Domatt war d’Saach fir mech erleedegt. Ech sinn elo viru kuerzem an eng Schoulklass invitéiert ginn fir genee dat Éischt Hëllef Buch virzestellen. Ech muss soen dass d’Joffer sech schonn am Virfeld ganz gutt preparéiert hat, d’Kanner scho vill wossten an och schonn deelweis Éischt Hëllef konnten. All Kand hat ee Classeur op der Bänk leien matt Kopien. Faarwege Kopien. Vu mengem Buch. Ech hunn näischt gesot. Mee ech hu mol nogerechent: Eng faarweg Kopie kascht em di 40 Cent am Kopieshop. Wann ech elo dovun ausginn dass d’Schoul selwer eng faarweg Kopiesmaschinn huet sinn d’Onkäschten liicht méi niddereg. Komm mir soen 20 Cent pro Kopie. Da kascht et also bei 70 Säiten 14 Euro fir ee Buch ze kopéieren. De reguläre Präis ass 13.50 Euro et kascht also 50 Cent pro Kand méi wann een d’Buch kopéiert wei wann een et keeft. Dobäi ginn dem Verlag ee ganze Batz Geld an dem Auteur ganz ë bëssi Geld verluer. Net nëmmen dass een illegal ass wann een ee Buch kopéiert, et ass ganz einfach och nach méi deier!

This entry was posted in Uncategorized. Bookmark the permalink.

Leave a Reply