Walfer Bicherdeeg

D’Walfer Bicherdeeg sinn ëmmer erëm intressant. Dëst Joer hat ech nach vill méi eng schlecht Plaz wei dat Joer virdrun. Ech hat mäi Stand an engem Mëttelgang. Do kommen schätzunsweis nëmmen hallef esou vill Leit laanscht wei bausse ronderëm. Ech erënnere mech mol eemol am Lycée, et misst op Paramedicale am Michel Lucius gewiescht sinn, geléiert ze hunn dass wann een an ee Supermarché erageet, een ëmmer den Drang huet no rechts ze goen. Dofir stinn am Supermarché oft di Saachen déi een absolut net brauch direkt rechts. Esou geet een trotzdem laanscht a wee weess, et keeft een och vläicht eppes. A genee aus deeër Ursaach hat ech gefrot fir dëst Joer däerfen mäi Stand iergendwou rechts vum Agang opzeriichten. Leider hat et net geklappt.

Ech hat awer besser Verkafszuelen wei d’Joer virdrun. Genee ee Buch war et méi wei bei der Editioun 2014. Mee ech hu vill Leit erëmgesinn. Leit déi ech schonn iergendwann a Couren hat, Léierpersonal bei deem ech mol mäi Buch an der Klass virgestallt hunn, Kollegen déi ech scho laang net méi gesinn hunn, Librairen déi mäi Buch an hirem Buttek hunn an esou weider.

Esou ee Maart steet a fält mam Noper vum Stand. Ass dat een ale Granzert, esou wei d’läscht Joer, ass d’Stëmmung allgemeng schlecht. Dëst Joer hat ech extrem Chance! Rechts nieft mir soutz eng Damm déi ganz einfach guer näischt gesot huet. Rechts nieft mir awer hat een eeleren Här säi Stand opgebaut. Hien hat seng zwee Enkelkanner dobäi déi him gehollef hunn. Direkt wei ech do war si mir an d’Gespréich komm. A ganz séier si mir um Thema Protection Civile gewiescht. Hien huet mir erzielt dass hien Garagiste war an deemools d’Opel Ambulanze geliwwert huet. Méi wei eemol huet hien Schrottautoen ob Schëmpech geliwwert fir Übungen an hien huet mir vun deeër schéiner aler Zäit do uewen erzielt. Wou de Josy nach Econome war an den Här Jung nach Direkter. De Leon Jung war iwwregens säi beschte Frënd an hien huet mir erzielt wat “de Léo” fir ee fantastesche Mënsch war. Mee dat wosst ech jo schonn well jiddereen dat iwwer hien seet.  Schonn alleng wéinst deem Mann waren d’Walfer Bicherdeeg fir mech ee vollen Erfolleg! Wann ee vun Iech iwwregens nach ee flotte Kaddo sicht oder fir sech selwer ee flott Buch kann ech mengem Noper säint nëmme recommandéieren: Time of love vum Eugène Reiter. Ee Buch matt ganz villen Deierefotoen.

Merci also dem Eugène Reiter fir dee flotte Weekend an di schéin Spiichten aus der gudder aler Zäit!

Nächst Joer wäert ech erëm op de Bicherdeeg sinn. Hoffentlech matt mindestens 2 neie Bicher: Mengem neie Krimi deen heescht: “Uelzechtdallkrimi” a mengem neie Buch wou ech d’Thema nach ëmmer net verroden!

IMG_3557

This entry was posted in Uncategorized. Bookmark the permalink.

Leave a Reply